33 000 Toschauers hebbt sik in de 25 Johr op Platt amüseert. De Idee för dat Theoter in de ole Winkelschüün, de is aver meist all dörtig Johr old, sineert Rainer Seidel, de Vörsitter vun‘ Bühnenbund: „Heinz Busch hett Carl-Ingwer Johannsen 1987 fraagt: Künnt wi nich mol Theoter spelen? Un denn güng dat los. Buten in’t Museum. Later sünd se denn op de Idee mit’e Theoterweek kamen.“ An‘ 13. Juli 1987 hett Heinz Busch dat eerste plattdüütsche Stück op’e Bühn bröcht: „Sprottenkathrin“. Sietdem hebbt sik de Theoterlüüd veel Nieges infallen laten – nich blots, wat de Stücke angeiht. Siet twee Johr gifft dat bavento een Kinnertheoter-Festval. 300 Kinner hebbt verleden Johr mitspeelt. Düt Mol sünd acht plattdüütsche Bühnen ut Land dorbi: Niemünster, Ahrensborg, Itzehoe, Kiel, Rendsborg, Lübeck, Flensborg un Preetz. De Bühnenbund hett sik veele frische Stücke utsöcht. Los geiht dat an‘ Sünnavend, 10.6. mit dat Stück „De arme Ridder“. Üm halvi söven dreiht sik all’ns üm Ludwig vun Schwitters un sien Lüüd in’t Seniorenheim. Bittersöte Ünnerholln. „Fröhstück bi Kellermanns“ gifft dat an‘ Sünndag avend. Wat sik dor so all’ns morrns an‘ Disch afspelen deit sünd Szenen einer Ehe. Maandagavend üm Klock söven steiht een Krimi op’t Programm: „Twee Bröder“. „Wenn de Katt ut’n Huus is“ – wat denn los is, wiest de Schauspelers ut Itzehoe Dingsdag üm Klock söven. Dor danzt nich blots de Müüs op’n Disch! Elli un Georg wünscht sik blots eens: „Endlich alleen“ ween – in de Komödie an‘ Mittwuch geiht dat üm de Kinner, de to üm to geern bi Mama backen blieven wüllt. Dunnerdag speelt glieks noch een Komödie: „Geiht nich, gifft nich“. Dat Stück dreiht sik üm de Minschen un ehr Macken. Jüst so süht dat ok in dat Stück „Blifft all’ns in de Familie“ ut. Fischer Jens kiekt lever in’e Köömbuddel, as wat op’e Been to stellen. De Idylle an‘ Strand is wat för Touris – aver Jens kriggt nix op’e Reeg. Woans dat utgeiht, kann een sik Fridag avend ankieken. Sünnavend denn „Noch mol vun vörn“ – tominnst heet dat Stück so. Een Mudder-Dochter-Stück mit een ganz besünnern Gast to Wiehnachten un veel Striet un Larm. Worüm Dickmops Peter Fischer in’e Diätklinik „Een Joghurt för twee“ kriggt, dat kann een sik an‘ Sünndag üm halvi söven ankieken. Un denn fallt eerst Mol wedder de Vörhang daal in’e Winkelschüün. th
www.buehnenbund.com
